Муносибатҳои дипломатии Ҷумҳурии Тоҷикистон ва Ҷопон пайваста густариш меёбанд, ки дар ин замина ҳамкориҳои илмию таълимӣ низ рушд карда истодааст. Бо мақсади таҳким бахшидани ин ҳамкориҳо дар пояи кафедраи забонҳои хориҷии факултети ҳуқуқшиносии Донишгоҳи миллии Тоҷикистон Маркази ҷопоншиносӣ таъсис дода шудааст.
Имрӯз (03.04.2025) дар мувофиқа бо Вазорати корҳои хориҷии Ҷумҳурии Тоҷикистон ва Вазорати маориф ва илми Ҷумҳурии Тоҷикистон ҷиҳати ғанӣ гардонидани маркази мазкур бо маводи таълимию омӯзишӣ 87 китоби тозанашр аз ҷониби сафири фавқулода ва мухтори Ҷопон дар Ҷумҳурии Тоҷикистон, хонум Фурута Кейко ба Маркази мазкур тақдим гардид.
Меҳмони олиқадр, сафири фавқулода ва мухтори Ҷопон дар Ҷумҳурии Тоҷикистон, хонум Фурута Кейко ва намояндагони Агентии ҳамкориҳои байналмилалии Ҷопон (JICA) дар Ҷумҳурии Тоҷикистонро муовини аввали ректори ДМТ Раҷабзода Ф.К. истиқбол намуд.
Зимни тақдими китобҳо гуфта шуд, ки иқдоми мазкур ба рушди ҳамкориҳои илмию таълимӣ мусоидат намуда, ба донишҷӯёну муҳаққиқон имкони бештар фароҳам меорад, то бо таъриху фарҳанги Ҷопон ошно шаванд. Китобҳои ҳадягардида, ки ба мавзуҳои гуногуни илмию фарҳангӣ бахшида шудаанд, дар пешбурди фаъолияти Маркази ҷопоншиносӣ нақши муҳим хоҳанд гузошт.
