Имрӯз (02.04.2025) дар Донишгоҳи миллии Тоҷикистон бахшида ба имзои Эъломияи Хуҷанд оид ба дӯстии абадӣ ва нақши он дар таҳкими ҳамкориҳои дӯстонаи кишварҳои Тоҷикистон, Қирғизистон ва Узбекистон ҳамоиши илмӣ баргузор гардид. Дар ҳамоиш мудири шуъбаи рушди иҷтимоӣ ва робита бо ҷомеаи дастгоҳи Раиси шаҳри Душанбе Саъдизода Ҷаҳонгир, ҳайати устодону кормандон ва донишҷӯёни Донишгоҳ иштирок намуданд.
Ҳамоиш бо садо додани Суруди миллӣ ва пахши иқтибос аз суханронии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни баргузории барномаи фарҳангии муштараки наврӯзӣ дар шаҳри бостонии Хуҷанд оғоз ёфт.
Ректори Донишгоҳ, доктори илмҳои ҳуқуқшиносӣ, профессор Насриддинзода Э.С. зимни суханронии хеш доир ба ташаббус ё иқдомоти таърихии Президенти Ҷумҳурии Тоҷикистон, муҳтарам Эмомалӣ Раҳмон дар арафаи ҷашни Наврӯзи байналмилалӣ ёдовар шуд. Инҳо сафари давлатии Пешвои миллат ба Ҷумҳурии Қирғизистон, ба имзо расидани Фармони Президенти Ҷумҳурии Тоҷикистон дар бораи бахшиши ҷазо, таҷлили Наврӯзи байналмилалӣ бо иштироки сарони давлатҳои Тоҷикистон, Қирғисизтон, Узбекистон ва имзои Эъломияи Хуҷанд оид ба дӯстии абадӣ мебошанд. Гуфта шуд, ки ин иқдомоти Пешвои муаззами миллат дар арафаи Наврӯз яке аз суннатҳои наврӯзӣ буда, на танҳо дорои аҳамияти сиёсию иҷтимоӣ ва фарҳангӣ буданд, балки рамзи сулҳ, ваҳдат, инсондӯстӣ ва пешрафти кишвару минтақа ба ҳисоб мераванд.
Дар идомаи суханронӣ роҷеъ ба аҳамияти таърихии Эъломияи Хуҷанд дар таъмини сулҳу субот ва ҳамкориҳои минтақавӣ андеша намуда, иброз дошт, ки Пешвои миллат таъкид карданд, ки “Мо ба анъанаҳои деринаву созандаи ҳамзистии дӯстонаи мардумони Осиёи Марказӣ содиқ мемонем. Ба ин мақсад дар муносибатҳоямон бо кишварҳои ҳаммарз ба пешбурди сиёсати дӯстӣ, ҳамсоягии нек, адами мудохила ба корҳои дохилии якдигар, истифодаи воситаҳои дипломативу сиёсӣ дар ҳалли масъалаҳои баҳснок, аз ҷумла масъалаҳои сарҳадӣ ва обу энергетика, афзалияти комил хоҳем дод”.
Дар идомаи ҳамоиш номзади илмҳои таърих, дотсент, декани факултети муносибатҳои байналмилалӣ Ҷаъфаров С.Х. дар мавзуи “Эъломияи дӯсти абадӣ – саҳифаи нав дар ҳамкориҳои минтақавӣ”, доктори илмҳои иқтисод, дотсенти кафедраи иқтисоди ҷаҳонии факултети молиявию иқтисодӣ Мирбобоев Р.М. оид ба мавзуи “Рушди ҳамкориҳои иқтисодӣ байни Ҷумҳурии Тоҷикистон ва ҷумҳуриҳои Қирғизистону Узбекистон” ва номзади илмҳои ҳуқуқшиносӣ, дотсенти кафедраи ҳуқуқи байналмилалии факултети ҳуқуқшиносии Донишгоҳ Сулаймонов Ф.С. оид ба мавзуи “Шартномаи байналмилалӣ – заминаи асосии ҳуқуқӣ барои густариши муносибатҳои байналмилалӣ” суханронӣ намуданд.
Зимнан гуфта шуд, ки Эъломияи Хуҷанд оид ба дӯстии абадӣ шароити мусоидро баҳри рушди ҳамкориҳои минбаъда фароҳам меорад. Он як марҳилаи нав дар равандҳои таърихии ҳамкориҳои минтақавӣ ба ҳисоб меравад.
