Муовини ректор оид ба тарбия

РАҲМОНЗОДА ҶАМИЛА МИРЗО

номзади илмҳои филологӣ, дотсент

Раҳмонзода Ҷамила Мирзо 20 майи соли 1964 дар Ҷумҳурии Тоҷикистон таваллуд шудааст. Соли 1983 ба факултети филологияи тоҷики УДТ ба номи В.И.Ленин дохил шуда, онро соли 1989 бо ихтисоси филолог-журналист хатм намудааст.

Раҳмонзода Ҷамила Мирзо аз соли 1983 корро ба сифати лаборанти шуъбаи тайёрии УДТ ба номи В.И.Ленин сар карда, баъдан ба сифати лаборанти калони кафедраи забони тоҷикии факултети филологияи тоҷик (1985-1989), инчунин, лаборанти калони кафедраи журналистика ва адабиёти халқҳои СССР кор кардааст.

Соли 2004 ба вазифаи методисти шуъбаи рӯзонаи факултети журналистика ва тарҷумонӣ ба кор пазируфта шуд. Солҳои 2005-2007 ассистент, ҳамзамон, аз 31 майи соли 2007 то 26 декбари 2007 муаллими калони кафедраи телевизион ва радиошунавонӣ, аз соли 2007 то соли 2011 муовини декан оид ба таълим ва соли 2011 дар вазифаи мудири кафедраи телевизион ва радишунавонии факултети журналистика кор кардааст.

 Номбурда аз соли 2007 аъзои Шӯрои олимони факултети журналистикаи донишгоҳ ва аз соли 2011 то ҳол аъзои Шӯрои олимони Донишгоҳи миллии Тоҷикистон мебошад.

Аз соли 2012 то ҳол ба ҳайси муовини ректор оид ба тарбия, ҳамзамон, дотсенти кафедраи телевизион ва радиошунавонии факултети журналистика кор ва фаъолият менамояд.

Натиҷаи фаъолияти илмию эҷодии Раҳмонзода Ҷ.М. дар зиёда аз 80 мақола ва фишурдаи мақола, 3-то дастури таълимӣ, зиёда аз 20 силлабус ва барномаи курсҳои тахассусӣ ва умумӣ инъикос гардидааст.

Дорандаи медали “Хизмати шоиста”, “Аълочии маориф ва илми Ҷумҳурии Тоҷикистон”, “Аълочии фарҳанги Ҷумҳурии Тоҷикистон”, “Аълочии матбуоти Ҷумҳурии Тоҷикистон”, медалҳои “20-солагии Қушунҳои сарҳадии Кумитаи давлатии амнияти миллии Тоҷикистон”, “25-солагии Қушунҳои дохилии Вазорати корҳои дохилии Ҷумҳурии Тоҷикистон”, ҷоизаи ба номи Абулқосим Лоҳутӣ”, ифтихорномаҳои ҲХДТ, Вазорати маориф ва илми Ҷумҳурии Тоҷикистон, Вазорати фарҳанги Ҷумҳурии Тоҷикистон, Мақомоти иҷроияи ҳокимияти давлатии шаҳри Душанбе , Кумитаи кор бо ҷавон ва варзиши назди Ҳукумати Ҷумҳурии Тоҷикистон”, Кумитаи кор бо занон ва оилаи назди Ҳукумати Ҷумҳурии Тоҷикистон ва Донишгоҳи миллии Тоҷикистон буда, узви Иттифоқи журналистони Тоҷикистон мебошад.

Раҳмонзода Ҷамила Мирзо таҳти роҳбарии профессор А.Саъдуллоев дар мавзӯи “Проблемагузорӣ дар публитсистикаи Мутеулло Наҷмиддинов” тадқиқоти илмӣ бурда, соли 2010 онро дифоъ намудааст. Зиёда аз 40 рисолаҳои дипломӣ, як рисолаи номзадӣ таҳти роҳбарии ӯ дифоъ гардидаст ва дигар рисолаҳои номзадӣ барои дифоъ омода мебошанд.

Муаллифи китобҳои “Воқеият ва публитсистикаи Мутеулло Наҷмиддинов”, “Ҷаҳони муосир: мавқеи симо ва садо”, “Хосияти публитсистика”(ҳаммуаллифӣ бо Б.Қутбиддин) ва чандин мақолаҳо дар маҷмуаҳои илмӣ ва дастаҷамъӣ мебошад.

Раҳмонзода Ҷамила Мирзо бо тарғиби сиёсати давлату Ҳукумати Ҷумҳурии Тоҷикистон дар чорабиниҳои муҳимми сиёсию фарҳангии сатҳи ҷумҳуриявӣ дар сафарбар намудани устодону кормандон ва донишҷӯёни Донишгоҳи миллии Тоҷикистон саҳми арзанда мегузорад.