Ҳамасола дар ҷумҳурӣ 15-уми апрел бахшида ба мавлуди сардафтари адабиёти муосири тоҷик, устод Садриддин Айнӣ чорабиниҳои гуногунсатҳ дар сохторҳои илмию таълимӣ баргузор мешавад. Имрӯз (15.04.2023) бахшида ба 145 солагии устод Айнӣ дар Донишгоҳи миллии Тоҷикистон ҳамоишҳои илмию назариявӣ роҳандозӣ шуд.
«Устод Айнӣ дар тамоми асарҳояш номи тоҷик ва ҳувияти миллии тоҷиконро махсус таъкид мекард». Ин нукта аз ҷониби декани факултети филологияи донишгоҳ, профессор Сироҷиддини Эмомалӣ зимни ифтитоҳи маҳфили илмӣ – адабие, ки таҳти унвони «Устод Айнӣ ва адабу фарҳанги миллӣ» дар толори Ганҷинаи профессор Шарифҷон Ҳусейнзода доир гардид, баён шуд.
Ҳамоиш бо ибтикори кафедраи назария ва адабиёти навини форсии тоҷикии факултети филологияи донишгоҳ созмон дода шуда, дар он айнишиносон, устодону донишҷӯён ширкат варзиданд.
Дар оғоз ректори ДМТ, профессор Хушвахтзода Қ.Х. дар робита ба ҷойгоҳи устод Айнӣ дар адабиёти тоҷик муфассал суханронӣ намуд. Таъкид гардид, ки бо ташаббуси Президенти Ҷумҳурии Тоҷикистон муҳтарам Эмомалӣ Раҳмон заҳматҳои устод Садриддин Айнӣ бо унвони олии Қаҳрамони Тоҷикистон қадрдонӣ шуданд. Инчунин, дар маросими ифтитоҳи боғи навбунёди Айнӣ Сарвари давлат изҳор доштанд: «Дар андеша ва осори устод Айнӣ масъалаи ташаккули ҳувият ва баланд бардоштани худшиносии миллӣ дар ҷойи аввал қарор дошт».
Дар ҷараёни мафҳил Маҳмадизода Қарор – мудири кафедраи назария ва адабиёти навини форсии тоҷикии факултети филология, Ҳафиз Раҳмон – муаллими калони кафедраи мазкур ва Кўчарзода Аламхон – профессори кафедра суханронӣ намуданд. Ҳамзамон, донишҷӯёни факултет аз осори устод Айнӣ шеърҳо қироат карданд.
Дар робита ба ин рӯз бо ташаббуси садорати факултети журналистикаи донишгоҳ зумрае аз устодону донишҷӯёни факултет ба зиёрати оромгоҳи ин устоди бузурги сухану адаб рафта, ёде аз рӯзгору осори устод Айнӣ намуданд. Илова бар ин, бо ташаббуси кафедраи услубшиносӣ ва таҳрири бадеии факултети мазкур мизи мудаввар таҳти унвони «Устод Айнӣ ва асолати забони тоҷикӣ» доир шуд.
