Дар доираи нақшаи чорабиниҳои раёсати Донишгоҳи миллии Тоҷикистон дар толори фарҳангии ба номи Ш. Ҳусейнзода хониши сиёсӣ бо иштироки мудири кафедраи психология Саидзода Баҳрулло ва раиси сарпарастони ДМТ Илҳомиддин Ашуров бо устодону донишҷӯёни факултети журналистика доир гардид.
Зимнан Саидзода Б. дар робита ба нуктаҳои гуногуни Паёми навбатии Асосгузори сулҳу ваҳдати миллӣ –Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон суханронӣ намуда, ҷиҳати дар амал татбиқ намудани дастуру супоришҳои роҳбарияти олии мамлакат ва раёсати донишгоҳ тависяҳои судманд дод. Зимнан гуфта шуд, ки дар замони муосир барои ҳар як давлати озоду соҳибистиқлоли миллӣ тарбияи аҳли ҷомеа дар рӯҳияи ватандӯстӣ ва ифтихори миллӣ яке аз вазифаҳои муҳим мешавад. “Мо вазифадорем, ки дар ин самт аз пештара бештар фаъолият намоем”-афзуд ӯ.
Саидзода Б. дар суханронии хеш иқдоми роҳбарияти донишгоҳро ҷиҳати баргузории хониши сиёсӣ дар самти такмили донишҳои муосир судманд арзёбӣ намуда, афзуд, ки яке аз масъалаҳои мубрами рӯз ин ҳифзи музаффариятҳои Истиқлоли давлатӣ, ба ҷавонон фаҳмондани равандҳои харобиовари замони муосир ва амиқ дарк намудани онҳо мебошад. “Сарвари давлат, Пешвои миллат муҳтарам Эмомалӣ Раҳмон дар яке аз баромадҳои хеш қайд намуданд: ки “Баробари таълим масъалаҳои тарбияи наврасону ҷавонон ва дар рӯҳияи ватандӯстиву инсонпарварӣ ва худогоҳиву худшиносӣ ба воя расонидани онҳо ниҳоят муҳим мебошад””- таъкид намуд Саидзода Б..
Дар идомаи чорабинӣ Саидзода Б. оид ба масъалаҳои иттилоотию тарғиботии сомонаҳои иҷтимоӣ ва шабакаҳои интернетӣ суханронӣ намуда, таъкид дошт, ки муҳимтарин мавзӯ дар ин самт ин мавзӯи ватандӯстӣ ва ҳифзи манфиатҳои миллист. Ватандӯстӣ аз ҳар фарди некноми Тоҷикистон маънавиёту маданияти баланд, ахлоқу нияти пок, муҳаббати бепоён ба ватани хешро талаб мекунад.
